Yuli Hku A Majaw Sumpra Bum Ginra Masha Ni Malu Masha A Matu Mayak Nga Ai Lam

Pajau Media

7 April 2026

Sumpra Bum ginra na nkau shara hkan maning na mam dan ten laman yuli hku a majaw mam kaji kajaw sha lu dan la ai majaw ya ten malu masha taw wa nna mayak hkrum nga ai hpe chye lu ai.

Sumpra Bum ginra Lungwang, Lagawn Kahtawng, Htingnan, Nsaim Yang, Hkindu Yang shara hkan yuli hku hku nna mam kaji kajaw sha dan la lu ai majaw malu masha taw wa nna mayak hkrum nga ai hpe Lungwang ginra masha langai tsun dan ai re.

“Anhte gaw yi sun hkauna ting na tang 25 sha lu ai. Nkau nga yang dan la na pi nnga, nkau namsi namsaw ni mung yawng sha ai majaw nlu mat ai. Ndai kaw gaw ja galaw ai lauban ni kalang marang n-gu buk mi sha gaw jaw ma ai dai hte sha asak hkrung taw nga ai” nga tsun ai.

Dai ginra hpe KIA uphkang da nna KIA hte NGO hpung ni karum matum kaji kajaw nga ai rai tim law ai lam nnga nkau htinggaw ni gaw nai sam ni sha sha taw ai nga tsun ai.

Sumpra Bum ginra hta yi sun hkauna hpe sha madung galaw sha nna laga shang grumhpraw bungli nnga ai majaw grau yak nga ai hpe chye lu ai.

Malu masha htaw la na matu mung lam yak ai majaw hka li, mawdaw, cycle ni hte alang lang htaw la ra ai majaw Lungwang mare du hkra nga yang n-gu buk mi hta sen 3 jan du hkra nga ai hpe chye lu ai.

Sumpra Bum ginra hta 2022 ning kaw na yuli hku du wa nna shaning shagu yuli hku grau law nna 2024 ning hte 2025 ning hkan hta sawng htum re hpe chye lu ai.

Shiga-Zau