Je Yang Kaw Na Ma Marai (3) Sat Hkrum Ai Amu Manghkang Hpe Matut Manoi Jep Joi Nga

Pajau Media

24.3.2025

(Jinghpaw mung Laiza muklum makau Je Yang hpyen yen dabang kaw nna ma marai (3) hpe rim woi mat nna sat kau ai manghkang shabyin ai slg Ung Sau La Doi gaw masha sat manghkang hpe shi galaw ai lam hkam la ai raitim dai amu kaw kadai ni lawm ai ngu hpe tsun shapraw ai lam n nga ai majaw matut jep joi nga dingyang re lam chye lu ai.

“Shi gaw masha sat manghkng hpe shi shabyin ai lam hkam la sai raitim dai amu manghkang kaw kadai ni lawm ai ngu hpe gara hku san tim ntsun shapraw ai majaw matut manoi jep joi ai lam galaw nga dingyang re,” nga nna tsun ai.

Ya aten tara hkam slg Ung Sau La Doi hpe Laiza hkyuk htawng kaw rim zing da nna san jep nga ai re hte tara hkam masha hte gindun ai lam hpe matut manoi sawk sagawn nga dingyang re majaw tara je wat lam naw ra nga ai re lam chye lu ai.

“Shi hte seng ai lam gaw amu manghkang gaw grai naw shuk shanuk ai re majaw sawk na n loi ai, raitim matut manoi jep joi nga ai,” nga nna tsun ai.

Mabyin gaw lai wa sai Febuary 22 ya shani slg Ung Sau La Doi a madu jan kaw sa wa ai asak 10 ning grup yin re ai num kasha marai 3 hpe rim woi mat nna zingri sat kau ai majaw Feb 25 ya hta rim hkrum ai re. N dai amu manghkang hpe KIO asuya hpung ni kaw nna gara hku tara je yang daw dan na hpe Mung masha yawng myit shang sha nga ma ai re.

Shiga- Hpring & Yaung Ni