တိုက်ပွဲကြောင့် မြစ်ကြီးနား-ရွှေဘိုသွား ကားလမ်းပိုင်း ရက်အကန့်အသတ်မရှိ ပိတ်ထား

ပါဂျောင်မီဒီယာ

၆ရက်၊ဖေဖော်ဝါရီ၊၂၀၂၆။

မြစ်ကြီးနား-ရွှေဘိုသွားလမ်းပိုင်းရှိ ကျောက်တန်းရွာတွင် တိုက်ပွဲဖြစ်ပွားနေပြီး စစ်ကောင်စီက ရွှေကိုးပင်ဂိတ်ကို ရက်အကန့်သတ်မရှိ ပိတ်လိုက်သောကြောင့် ‌‌‌‌‌‌‌‌‌‌‌‌‌‌‌‌‌‌‌‌‌‌ကားအစီးရေများစွာ ပိတ်မိနေကြောင်း ကားသမားများထံမှ သိရသည်။

စစ်ကောင်စီသည် မြစ်ကြီးနား-ရွှေဘိုလမ်းပိုင်းရှိ ရွှေကိုးပင်ဂိတ်ကို ပိတ်ထားသလို၊ အတက်ကားများကို ပိတ်ပင်ထားပြီး အဆင်းကားများကိုသာ လွှတ်ပေးနေသောကြောင့် ခရီးချိန်ကြန့်ကြာမှုရှိနေကြောင်း သိရသည်။

“အဆင်းဆိုရင်ရတယ်။ အတက်ဆိုရင် လုံးဝမလွတ်ပေးတော့ဘူး”ဟု ကားသမားတစ်ဦးက ပြောသည်။

ထို့အပြင် မြစ်ကြီးနား-မန္တလေးဗျူဟာလမ်းတွင်လည်း တိုက်ပွဲများ ဖြစ်ပွားမှုရှိနေသောကြောင့် ကားနှင့် ခရီးသွားပြည်သူများ ထိခိုက်မှုများရှိနေသည်။

ပြီးခဲ့သည့် ဒီဇင်ဘာလကတည်းက မြစ်ကြီးနား-မန္တလေးဗျူဟာလမ်းကို စစ်တပ်က ထိန်းချုပ်ထားခဲ့ပြီး နှစ်ဖက်ထိတွေ့တိုက်ပွဲ မကြာခဏဖြစ်ကာ လမ်းပိတ်ဆို့မှုများကြောင့် ကုန်ကားအစီးရေ ရာနဲ့ချီ ပိတ်မိနေကာ ကုန်ပစ္စည်းများလည်း ပုတ်သိုးပျက်စီးဆုံးရှုံးမှု များစွာရှိနေကြောင်း သိရသည်။

သတင်း-ဖရိန်း