စစ်ကောင်စီ၏လက်နက်ကြီးကြောင့် ဆိုင်းတောင်ပြည်သူ (၁)ဦးသေဆုံးကာ၊ ကလေးငယ်အပါ (၅) ဦး ထပ်မံဒဏ်ရာရရှိ
- Pajau Media
- Aug 8, 2025
- 1 min read
ပါဂျောင်မီဒီယာ
၈ရက်၊ သြဂုတ်၊ ၂၀၂၅
ကချင်ပြည်နယ်၊ ဖားကန့် ဆိုင်းတောင် ဆုတောင်းကုန်းအနီးရှိ ဆိပ်မူ KBC ဘုရားကျောင်းဝင်းထဲသို့ ယမန်နေ့ သြဂုတ်လ ၇ ရက် ည (၉) နာရီကျော်ဝန်းကျင်ခန့်က စစ်ကောင်စီတပ်မှ ပစ်ခတ်လိုက်သော လက်နက်ကြီး ကျရောက်ပေါက်ကွဲသောကြောင့် ပြည်သူများထိခိုက်ဒဏ်ရာရကာ၊ သေဆုံးသူလည်းရှိကြောင်း သိရှိရသည်။
"ဆိုင်းတောင်ဆုတောင်းကုန်းထဲကျတာဆိုတော့ သေချာတယ် သူတို့တွေတမင်ကို ပြည်သူတွေကိုပစ်မှတ်ထားပြီး ပစ်နေတာပဲ။ ဘယ်အချိန်အထိဆက်ပစ်နေကြဦးမလဲမသိဘူး" ဟု ဖားကန့်ဒေသခံတစ်ဦးမှ ပြောသည်။
ထိုလက်နက်ကြီးမှာ ဖားကန့်ဗျူဟာကုန်းတွင်တပ်ထိုင်ထားသော စစ်ကောင်စီတပ်မှ ပစ်ခတ်လိုက်သော လက်နက်ကြီးဖြစ်ကာ ဆိုင်းတောင်ဆိပ်မူရပ်ကွက်ရှိ ဆုတောင်းကုန်းအနီး ကချင်နှစ်ခြင်းခရစ်ယာန် (KBC) ဘုရားကျောင်းဝင်းအတွင်း ကျရောက်ပေါက်ကွဲခဲ့ခြင်း ဖြစ်သည်။
ထိုသို့လက်နက်ကြီးကျရောက်ပေါက်ကွဲမှုကြောင့် အပြစ်မဲ့ ဒေသခံပြည်သူအမျိုးသမီးတစ်ဦးသေဆုံးပြီး ကလေးငယ်တစ်ဦးအပါအဝင် ပြည်သူ (၅)ဦး ပြင်းထန်စွာ ထိခိုက်ဒဏ်ရာ ရရှိခဲ့သည်။
ထို့အပြင် ၅ ရက်နေ့က ဖားကန့် စည်ပင်ကွက်သစ် ဧရိယာတွင် ကျရောက်ပေါက်ကွဲခဲ့သည့် စစ်ကောင်စီ၏ လက်နက်ကြီးပစ်ခတ်မှုကြောင့်ဒဏ်ရာရရှိခဲ့သည့် ၉ တန်းအရွယ် ကျောင်းသူမှာ ဆေးကုသမှုခံယူနေစဥ်အတွင်း သေဆုံးသွားကြောင်း ထပ်မံသိရှိရသည်။
သတင်း_ အန်ဒီ
Comments