ဖားကန့်တွင် ​မြေစာပုံပြိုကျပြီး ရေမဆေးကျောက်ရှာဖွေသူ ၂၀ ဝန်းကျင်​ခန့် အသက်သေဆုံး

ပါဂျောင်မီဒီယာ။

၂၁ရက်၊ဇူလိုင်လ၊၂၀၂၅။

ယနေ့ ဇူလိုင် ၂၁ရက်နေ့ မနက် ၆နာရီခွဲဝန်းကျင်အချိန်ခန့်က ဖားကန့်မြို့နယ်၊ မော်စီစာကျေးရွာအနီးရှိ ကျောက်စိမ်းတူးဖော်ရာ အောင်သာယာ (၂) မှော်လုပ်ကွက်တွင် မြေစာပုံပြိုကျခဲ့ပြီး ရေမဆေးကျောက်ရှာဖွေသူ အယောက် ၂၀ ဝန်းကျင်ခန့် သေဆုံးသွားခဲ့ရကြောင်း သိရသည်။

ထိုပြို​ကျသွားသောမြေစာပုံအဟောင်းမှာ မှော်စီစာကျေးရွာအနီးရှိ အောင်သာယာ (၂) မှော်လုပ်ကွက် (စိန်စိန်နှင့်ဂျတ်ပါဝါ ကုမ္ပဏီများ) အတွင်းမှ မြေစာပုံဖြစ်ကာ လက်ကျင်းတူး ရေမဆေးရှာဖွေသူများမြေစာပိကာ သေဆုံးရခြင်းဖြစ်ကြောင်းသိရသည်။

မျက်မြင်တစ်ဦး၏အဆိုအရ "ဒီဘက်ခြမ်းက အိမ်တစ်လုံးထဲမှာရှိနေတဲ့သူတွေကော၊ အောက်ကကျင်းထဲက လူတွေကော အား​လုံးပေါင်း အယောက် ၂၀ ဝန်းကျင်လောက်ရှိတယ် ပိုရင်လည်းပိုလောက်တယ်။ အခုအချိန်ထိတော့ ပေါ်လာတဲ့ ၂ လောင်းပဲဖော်နိုင်သေးတယ်။" ဟု ဆိုသည်။

မြေစာပုံပြိုကျသည့် မနက်အချိန်မှစ၍ ယခုနေ့လည်အချိန်ထိ အထက်ပါ ရုပ်အလောင်း ၂ လောင်းကိုသာရှာဖွေဖော်ထုတ်နိုင်သေးကြောင်းသိရသည်။

ဖားကန့်ဒေသတွင် မိုးရာသီအချိန်ရောက်တိုင်း ကျောက်စိမ်းလုပ်ကွက်များ လုပ်ကွက်ဟောင်းများရှိ မြေစာပုံများပြိုကျကာ ရေမဆေးကျောက် ရှာဖွေသူများ မကြာခန မြေစာပိသေဆုံးခြင်းများ ဖြစ်ပေါ်လေ့ရှိသည်။

သတင်း- အန်ဒီ