မြစ်ကြီးနားမြို့တွင် တစ်ရက်လျှင် လျှပ်စစ်မီး (၈)နာရီသာရရှိသဖြင့် ပြည်သူများအခက်တွေ့နေ

ပါဂျောင်မီဒီယာ။

၁၆ရက်၊ဇန္နဝါရီ၊ ၂၀၂၅။

ကချင်ပြည်နယ်၊ မြစ်ကြီးနားမြို့တွင် ပြီးခဲ့သည့် ဇန္နဝါရီ ၁၄ရက်နေ့မှစပြီး လျှပ်စစ်မီးပျက်ချိန် ပိုမိုကြာမြင့်လာပြီး၊ တစ်ရက်လျှင် နာရီအနည်းငယ်သာ ဓါတ်အားဖြန့်ဖြူးပေးသွားမည်ဖြစ်ကြောင်း ဘူးဂါးလျှပ်စစ်ဓာတ်အားပေးကုမ္ပဏီ၏ထုတ်ပြန်ချက်အရ သိရသည်။

မြစ်ကြီးနားမြို့နှင့် ဝိုင်းမော်မြို့အား လျှပ်စစ်ဓါတ်အားဖြန့်ဖြူးပေးနေသော ဘူးဂါးလျှပ်စစ်ဓါတ်အားပေးကုမ္ပဏီမှာ လျှပ်စစ်ဓာတ်အား လုံလောက်စွာမရရှိသောကြောင့် လျှပ်စစ်မီး အချိန်မှန်မပေးနိုင်ခြင်းဖြစ်ပြီး၊ ရပ်ကွက်အလိုက် အုပ်စုခွဲကာ အချိန်အကန့်အသတ်ဖြင့်သာ ဓါတ်အားဖြန့်ဖြူးပေးသွားမည်ဖြစ်ကြောင်း ဖော်ပြထားသည်။

မြစ်ကြီးနားမြို့ရှိ ရပ်ကွက်များကို အုပ်စု(A)၊ အုပ်စု(B)နှင့် အုပ်စု(C)ခွဲကာ တစ်ရက်လျှင် အုပ်စုတစ်အုပ်စုအား (၈)နာရီစီသာ အလှည့်ကျစနစ်ဖြင့် ဖြန့်ဖြူးပေးသွားမည်ဖြစ်ကြောင်း သိရသည်။

လက်ရှိ တစ်နိုင်ငံလုံး လျှပ်စစ်မီးရရှိမှုနှုန်းမှာ အဆိုးဝါးဆုံးအဆင့်သို့ ရောက်ရှိနေပြီး လျှပ်စစ်ထုတ်လုပ်မူ၏ ၄၅ ရာခိုင်နှုန်း ရရှိထားသော ရန်ကုန်မြို့တွင်လည်း တစ်ရက်ကို (၈)နာရီသာ လျှပ်စစ်မီးထုတ်လွှတ်ပေးမည်ဖြစ်ကြောင်း စစ်ကောင်စီ၏ထုတ်ပြန်ချက်အရ သိရသည်။

ထို့ကြောင့် ဒေသခံများမှာ လျှပ်စစ်အစားထိုးအဖြစ် အချက်အပြုတ်အတွက် မီးသွေးနှင့် ထင်းမီးကိုသာ အဓိကအသုံးပြုလာကြပြီး၊ လက်ရှိ မီးသွေးခဲတစ်အိတ်မှာ ခြောက်သောင်းကျပ်၊ ထင်းတစ်တန်လျှင် တစ်သိန်းဝန်းကျင်နှင့် သစ်ခွဲသား ထော်လာဂျီတစ်စီးလျှင် သုံးသိန်းအထိ ရှိနေကြောင်း သိရသည်။

သတင်း - ဇော်