မြစ်ဆုံစီမံကိန်း ပြန်လည်စတင်ရန် ကြိုးပမ်းခြင်းမှာ လူတစ်စု အကျိုးစီးပွားသာ ဖြစ်သည်ဟု KSHRDN ထုတ်ပြန်

ပါဂျောင်မီဒီယာ

၈ရက်၊ဧပြီ၊၂၀၂၆။

ကချင်ပြည်နယ်မှ မြစ်ဆုံစီမံကိန်း ပြန်လည်စတင်ရန် ကြိုးပမ်းနေမှုဟာ လူတစ်စု၏ အကျိုးစီးပွားအတွက် ဒေသခံများကို ခြိမ်းခြောက် ဖိအားပေးနေခြင်း ဖြစ်သည်ဟု ကချင်ပြည်နယ် လူ့အခွင့်အရေး ကာကွယ်စောင့်ရှောက်သူများ ကွန်ရက် (KSHRDN) က ပြောဆိုလိုက်သည်။

နိုင်ငံရေးမတည်ငြိမ်မှုနှင့် စစ်ရေးပဋိပက္ခများ ပြင်းထန်နေချိန်တွင် ဆယ်စုနှစ်တစ်ခုကျော်ကြာ ဆိုင်းငံ့ထားသည့် မြစ်ဆုံရေကာတာစီမံကိန်းကို စစ်ကော်မရှင်က ပြန်လည်စတင်ရန် လုပ်ဆောင်လာခြင်းမှာ ပြည်သူလူထု အကျိုးစီးပွားထက် လူတစ်စုအကျိုးကိုသာ ရှေ့ရှုသည့် လုပ်ရပ်သာဖြစ်ကြောင်း (KSHRDN) က ဆိုသည်။

လူထုကန့်ကွက်မှုကြောင့် ပြီးခဲ့သည့် ၂၀၁၁ ခုနှစ်ကတည်းက ယာယီဆိုင်းငံ့ထားခဲ့သော်လည်း လက်ရှိအချိန်တွင် စစ်ကောင်စီက မြစ်ဆုံစီမံကိန်း ပြန်လည်စတင်ရန်အတွက် လူထုစည်းရုံး တွေ့ဆုံပွဲများကို ၁၃ ကြိမ်တိုင် ပြုလုပ်ခဲ့ပြီဖြစ်ကြောင်း သိရသည်။

ထို့ပြင် လူ့အခွင့်အရေးကာကွယ်စောင့်ရှောက်သူများ ကွန်ရက် (KSHRDN)က မြစ်ဆုံရေကာတာ စီမံကိန်း ပြန်လည်ဆောက်လုပ်ရန် လုပ်ဆောင်လာခြင်းအပေါ် ပြင်းထန်စွာ ကန့်ကွက်ရှုတ်ချလိုက်ကြောင်း သဘောထားထုတ်ပြန်ခဲ့သည်။

သတင်း - ဖရိန်း