မိုးညှင်း-အင်ကြင်းကုန်းတွင် ရှမ်းနီပြည်သူ့စစ်နှင့် ဟိုပင် PDFအကြား စစ်ရေးတင်းမာနေ

ပါဂျောင်မီဒီယာ

၅ရက်၊ သြဂုတ်၊ ၂၀၂၅။

ကချင်ပြည်နယ် မိုးညင်းမြို့နယ် အင်ကြင်းကုန်းတွင် စစ်ကောင်စီလက်အောက်ခံ ရှမ်းနီပြည်သူ့စစ်တပ်ဖွဲ့နှင့် ဟိုပင်မြို့နယ် ပြည်သူ့ကာကွယ်ရေးတပ်ဖွဲ့​ကြား တိုက်ပွဲဖြစ်ပွားခဲ့ပြီး လက်ရှိချိန်ထိ စစ်ရေးဆက်လက် တင်းမာနေဆဲဖြစ်ကြောင်း ဒေသခံပြည်သူများထံမှ သိရသည်။

"ဒီရက်ပိုင်းထဲ ရှမ်းနီ​တွေက ရွာထဲစစ်သားလာကောက်တာတော့ PDF တွေက ကြားဖြတ်တိုက်ခိုက်ခဲ့တာဖြစ်တယ်"ဟု အင်ကြင်းကုန်း ဒေသခံတစ်ဦးက ပြောသည်။

စစ်တပ်လက်အောက်ခံ ရှမ်းနီတပ်နှင့် ဗျူစောထီးပြည်သူ့စစ်တပ်ဖွဲ့တို့ ပူးပေါင်းပြီး ပြီးခဲ့သည့် ဇွန်လမှစတင်၍ မိုးညင်းနှင့် ဟိုပင်မြို့နယ်ထဲတွင် စစ်ကြောင်းထိုးကာ တိုက်ပွဲများ စတင်လာသည့်အပြင် စစ်သားလိုက်လံစုဆောင်းနေသောကြောင့်လည်း လူငယ်အများအပြား ထွက်ပြေးတိမ်းရှောင်နေရကြောင်း သိရသည်။

ရှမ်းနီပြည်သူ့စစ်တပ်ဖွဲ့များသည် ဟိုပင် - မိုးညင်းရှိ ရထားလမ်းပိုင်းနေရာနှင့် မိုးညှင်း - မြစ်ကြီးနား ကားလမ်းပိုင်းဘေးရှိ အင်ကြင်းကုန်းကျေးရွာတွင် စစ်သားအင်အား ၇၀ ခန့်ဖြင့် တပ်စွဲ​နေရာယူထားကြပြီး သြဂုတ်လမှစ စစ်ရေးတင်းမာလာသည်ဟု ဆိုသည်။

လက်ရှိကချင်ပြည်နယ် ဖားကန့်မြို့နယ်အပါအဝင် ဗန်းမော်နှင့် မ်ိုးညှင်းမြို့နယ်တို့တွင် တိုက်ပွဲ မကြာခဏဆိုသလို ဖြစ်ပွားနေပြီး စစ်တပ်၏ လေကြောင်း လက်နက်ကြီးများ ပစ်ခတ်တိုက်ခိုက်မှုကြောင့် ပြည်သူအများအပြား ထိခိုက် သေဆုံးနေသည်။

သတင်း-ဖရိန်း