(၇၇)နှစ်မြောက် ကချင်ပြည်နယ်နေ့ကို မြစ်ကြီးနားမြို့တွင် စစ်ကောင်စီကျင်းပ

ပါဂျောင်မီဒီယာ

၁၀ရက်၊ဇန္နဝါရီ၊၂၀၂၅။

ယနေ့ကျရောက်သည့် (၇၇)နှစ်မြောက် ကချင် ပြည်နယ်နေ့ အခမ်းအနားကို စစ်ကောင်စီ ဦးစီးဦးဆောင်မှုဖြင့် မြစ်ကြီးနားမြို့ရှိ ကချင်ပြည်နယ်အစိုးရရုံးတွင် လုံခြုံရေးတင်းကြပ်စွာ ကျင်းပဆင်နွှဲနေကြောင်း သိရသည်။

အဆိုပါ အခမ်းအနားတွင် စစ်ကောင်စီအဖွဲ့ဝင် ပြည်ထောင်စုဝန်ကြီး (၉)ဦးအပြင် ဌာနေပြည်သူ့စစ်ခေါင်းဆောင်များ၊ တိုင်းရင်းသားစာပေနှင့် ရိုးရာယဉ်ကျေးမှုအသင်းအဖွဲ့မှ တာဝန်ရှိသူများ၊ မြောက်ပိုင်းတိုင်းစစ်ဌာနချုပ် တိုင်းမှုးနှင့် အရာရှိများ တက်ရောက်ခဲ့သည်။

ကချင်ပြည်နယ်နေ့တွင် ကချင်လူမျိုးစုများ စစ်ပွဲအောင်နိုင်ချိန်တွင် ကလေ့ရှိသည့် ပဒန်မနောင်လည်း ထည့်သွင်းဆင်နွှဲခဲ့ပြီး၊ ဈေးရောင်းပွဲတော်အပါ လုံခြုံရေးတင်းကြပ်စွာဖြင့် ကျင်းပဆင်နွဲခဲ့သည်။

စစ်ကောင်စီက (၇၇)နှစ်မြောက် ကချင်ပြည်နယ်နေ့ အထိမ်းအမှတ်အဖြစ် ဧရာဝတီရှု့ခင်းသာဖွင့်ပွဲ၊ မနောဖွင့်ပွဲနှင့် ယဉ်ကျေးမှုပြတိုက်ဖွင့်ပွဲများကိုလည်း ဇန္နဝါရီ ၉ရက်နေ့ကတည်းက ကြိုဆိုကျင်းပခဲ့ကြောင်း သိရသည်။

ထို့အပြင် KIO ထိန်းချုပ်နယ်မြေဖြစ်သည့် မံစီမြို့နယ်၊ မန့်ဝိန်းကျေးရွာမှ အထက်တန်းကျောင်းနှင့် ကချင်နှစ်ခြင်းအသင်းတော် ဘုရားကျောင်းဝင်းတွင် ယနေ့ကျရောက်သည့် ကချင်ပြည်နယ်နေ့အား ကျင်းပဆင်နွှဲခဲ့ကြောင်း ဒေသခံများထံမှ သိရသည်။

အဆိုပါ အခမ်းအနားတွင် ကျောင်းသား/သူများ ၊ မိဘပြည်သူများနှင့် သင်းအုပ်ဆရာများဖြင့် စည်စည်ကားကား ကျင်းပခဲ့ပြီး ကျောင်းသားများမှလည်း ကချင်ပြည်နယ်နေ့ကို မနောင်အကဖြင့် ကြိုဆိုကျင်းပခဲ့သည်ဟု ဆိုသည်။

ကချင်ပြည်နယ်နေ့ကို လွန်ခဲ့သည့် ၁၉၄၈ခုနှစ် ဇန္နဝါရီလ (၁၀)ရက်နေ့တွင် ကချင်ပြည်နယ်နေ့ဟု သတ်မှတ်ပြီး၊ မြစ်ကြီးနားမြို့ စီတာပူရပ်ကွက်တွင်ရှိသည့် မနောကွင်းနေရာတွင် မနောင်အကများဖြင့် ဆင်နွဲခဲ့ရာ၊ ယခုနှစ် ၂၀၂၅ခုနှစ်တွင် (၇၇)နှစ်မြောက် ကျရောက်လာခဲ့ပြီဖြစ်သည်။

ထို့နည်းတူ ပြည်သူလူထုများ၏ မူလရည်မှန်းချက်ဖြစ်သော တန်းတူရည်တူ ကိုယ်ပိုင်ပြဌာန်းခွင့်ရှိ ဖက်ဒရယ်ဒီမိုကရေစီ နိုင်ငံတော်သစ် တည်ဆောက်ရန်နှင့် စစ်အာဏာရှင်စနစ် အမြန်ဆုံးအမြစ်ဖြတ်ရန် ပြည်သူလူထုများအားလုံး ဝိုင်းဝန်း၍ လုပ်ဆောင်သွားကြရန် ယနေ့ကျရောက်သော (၇၇)နှစ်မြောက် ကချင်ပြည်နယ်နေ့တွင် “Kachin National Forum-KNF”အဖွဲ့အစည်းမှလည်း သဘောထား ထုတ်ပြန်ထားသည်။

သတင်း - ဇော်မိုင်